ساچ آغاردي، اورك ياندي!

آي آشيقلار ياسا گلين، بوردا قاجاليق وار

عصيرلرين يانقيسي وار آديندا

هاميدان چوخ كرم قاليب ياديندا

آي "زليم خان" كوله دؤندوم اودوندا

دئمه سينلر يالانا باخ يالانا

2-

ساچ آغاردي، آنجاق اورك

آلوولودور اولكي تك

ساچ آغاردي، آنجاق نه غم!

اليمده دير هله قلم ...

بيليرم كي دئمه يه جك؛

بير سئوگيليم، بيرده وطن!

شاعير نه تئز قوجالدين سن!

                             "صمد وورغون"

3-

گؤز ياشيني تؤك سينه مه دفن ائله

آغلاييرسان ساغليغيمدا آغلا سن

قهرين وارسا ساغليغيمدا قهر ائله

آغلاييرسان ساغليغيمدا آغلا سن

قورخ كي صاباح قبيرلرده چاپيلا

اينجيله شن گؤز ياشلاري قاپيلا

گؤز ياشلاري آل وئرچيسي تاپيلا

آغلاييرسان ساغليغيمدا آغلا سن

                             "جابير نووروز"

عباس بارز (اسلامي) 1298-جي گونش ايلي اهرين بئش كيلومئتريلييينده كي شئيور داغلارينين اَته يينده يئرله شن آي پيرزن كندينده دونيايا گؤز آچدي. بويا باشا يئتندن سونرا آتاسي شيخ الاسلام ميرزه جعفرين مكتبينده ديني، حوزه وي و ميللي مكتبلرين باشا ووردو. نئجه شئعره آليشديغيني اؤزو بئلنچيك ديلينه گتيرير؛ «منيم شاعير اولماغيما بير جان يانديران داستان سبب­دير. آتامين عمواوغلانلاريندان بيريسي ايكينجي بين­الخالق سويّه­سينده اوزوئرن دؤيوشدن سونرا گنجه­دن ايرانا ساري گلمه­يه مجبور اولدو. او اؤزيلن ايكي قيز گتيرميشدي، اونلار جولفادان تبريزه گليب بيزده بو خبري ائشيدن چاغي رحمتليك آتام و بؤيوك قارداشيم اونلاري قوناق گتيرمك اوچون تبريزه ساري يولا دوشدوك. او قيزلارين بيريسي دوققوز ياشيندا و بيريسي يئددي ياشيندا ايدي، ايلك گؤروشده بو دوققوز ياشيندا قيزين عشقي و محبتي مني مفتون ائله­دي و جانيما بير يانار اود سالدي كي اينديده آلوولاري اوره ييمده گؤرسه­نير. منيم او زامان اون­دؤرد ياشيم وارايدي، من اونا بير اور­ك وئرركن، او منه مين اور­ك وئردي، محبت هر ايكي طرفدن گوجلويدير، من اونونلا ائولنمك ايسته­ييرديم آما منيم آداملاريم بو ايشه راضي اولماديلار، بئله سي بير يانار اورك­له بئش ايلدن آرتيق، عؤمرومون گنج چاغلارين گئچيرديم. او يادلاردا قالان ايللرده من بئله بير گوجلو عشقيلن شاعير اولدوم.»

ايلك گونلرين مهجورو و ايندينين بارزي بيرينجي شئعرين اون آلتي ياشيندا يازير. بو اولايدان سونرا اؤز عمي قيزيسينه(خديجه خانيما) اورك باغلايير، بير اوغول و بير قيز آتاسي اولور. آما يازيقلار اولسون فلك بو سئوگي يه ده ماجال وئرمه يير و شاعير بوتون عؤمور بويو بو ايتگي ني اؤزيله داشيير. سونرالا ايندي كي حايات يولداشي فاطيمه آذر خانيميلا سئوگي يوواسين باغلايير ، قيام ايسلامي وبابك ايسلامي كيمين شاعير بالالار ائليميزه پاي وئرير. اونوتماميش دئمه لي ييم كي ايلك حيات يولداشيندان اولان مسعود اسلامي دا اؤز آتاسينين يولون گئدنلردن اولور و گؤزل گؤزل يازيلار يازير.

1340-جي ايلده اؤيرتمنلييه باشلايير و اوتوز ايلدن سونرا بو ايشده تقاعدليك مقامينا چاتير.

«آتاسي­نين علمي، ادبي و تاريخي اثرلري 1320-جي گونش ايلي، ايكينجي بين­الخالق محاربه­سي، شهريورين اوچونده اوروس قوشونو ايرانا كئچنده يانديريليب.

بو اولايين تاييدا 1357-جي ايلده تيكرار اولوب، آتاسينين باشينا گلن، بالاسينين باشينادا گليب. همين زامان بارزين ييرمي مين بيت شعري محو اولوب كي اؤزو دئيير؛ شاه زاماني قويلاميشديم و بير زامان چيخارداندا گؤردوم نؤيود دامجي­لارينين آلتيندا چورويوب و يالنيز اپريميش كاغاذ اليمه گلدي.»، "كاغيذلاري چيخارتيدق گؤردوك نوقطه لري گؤز يئكه ليكده اولوب داها اوخونمور".

" گلهاي رنگارنگ" ايلك كيتابينين آدي دير. ائل داياغينا سلام(1346){بو كيتاب بارز اؤزو دئميشكن 1333-جو گونش ايلينده يازيلميشدير و حيدربابايا يازيلان ايلك نظيره دير}، 10 جيلديليك ساتيريك شئعرلري(مؤسسه مطبوعاتي يزداني تبريز)، قيزيل قوش(1357) و 1379-جو ايلده ياسلي ساوالان بارزين ياييلميش كيتابلاريدير. 

آي آشيقلار ياسا گلين، چوبان قارداش، ساري­داش، شئيور پوييماسي، باياتي­لار، ساري و سوسن داستاني و... كيمي كيتابلار بارزين هله ياييلماميش كيتابلارينين آديدير.

"گئجه لر" شئعري، "ياسلي ساوالان" شئعري بوتون سينيرلاري سينديردي. بوردا يازيلدي بوتون دونيادان سسي گلدي. "بير منم بير بو قلم بيرده بو ويرانه كؤنول / اوچوموزده گليريك ناله يه باهم گئجه لر"ي چوخ اورك لره داياق اولدو. "چنلي بئلده «ده­لي­لر» قوي يئنه قورسون بوساطي / قوچ كوراوغلو يئنه جولانه گتيرسين قيرآتي / هئچ زامان اصلين ايتيرمز او كي دوزگوندو ذاتي / آند اولا آديوا، آي گؤزلري آغلار-ياشي قان / آي ياغان باشينا غملر اودو، ياسلي ساوالان"ني اورك لري گؤورتدي.

بارز شئورين دومانلي چيسكينلي قوينوندا دونيابا گؤز آچديغينا گؤره داغا داشا، طبيعته هر بير آذربايجانلي كيمين وورغوندور. شئعرلرين آراشديراندا بو قونو آپ آيدين گؤزه چارپير. گنج و اورتا ياش چاغلاري بوتون آذربايجان داغلارين اؤزو دئميشكن دولانيب. قارلي قيروولي داغلاردا باغداش قوروب اَيله نيب. آما يازيقلار اولسون ايندي قوجاليغينا گورا هئچ بير يئره چيخانمير. بارز شئعرينده داغدان يازيرسا شئعري اَيلنجه دئييل، دينجلمك دئييل. داغدان يازيرسا داغدان ائنيرسن ائنيرسن شهره ساري گليرسن. گليرسن گليرسن اينسانلارا يئتيرسن. اينسانلاردا گليرسن گليرسن ايچينه گيريرسن. ايچينده گليب بئينينه چيخيرسان. ياني دوشونورسن. گوله گوله آغلاييرسان.

جوما آخشاميندان جوما آخشامينا تبريزده شئعر آخشامينا گئدرميش. شاعير دوستلاريلا بيرگه شئعره باشلارميشلار. يحيي شيدادان آد گلنده گؤزلري ايشيقلانير، ديكه ليب حالين سوروشور. "گؤيلون ايسته مير يحيي شيدا ايله گؤروشه سن" ديينده "نييه گؤيلوم ايسته مير آما بو داريخما مني يازيق ائله ييب" دئييب دولور. سانكي شئيوره بولود چؤكور.

ايكي ايلدير اعصاب خسته لييينه گؤره داها شئعر يازانمير. گئچه جه يين خاطيرلايير، راديودا آپاريجيليغين، شئعر پروقراملارين، مارالان مارالين. سانكي گؤزلرينه ايشيق ساچيلير. دوروب دوروب آه چكير. زهتابي ني خاطيرلايير. صمد عمي دن دانيشير، اؤلوموندن، آجي خبردن. قاراباغ فاجيعه سينده بوتايدان دوروب اوتايا آغلاديغيندان دانيشير. باكي سفريندن سؤز آچير. بختيار واهابزاده يه يازيب يوللاديغي شئعردن دئيير. دئييب دئييب يورولور. بيزه باخيب باشين توولايير؛ بو داريخما مني نئجه يازيق ائله دي! چايلاريزي ايچين سويوماسين. "اوستاد اوشاقلارين چوخو سيزي گؤرمك ايسته ييرلر، آما ايسته ميرلر سيزي اينجيتسينلر"ي ائشيدنده "يوخ يوخ بونلار نه سؤزدور بورا اونلارين هاميسينين ائويدير گليب بير قورو چاي ايچيب گئده جك لر داها بونون اينجيك لييي يوخدور كي منه" دئيير.

ائشمه بيغلاري، اوزون آغ ساچلاري، بؤركو، يئريشي، دولانيشيغي، دانيشيغي، داورانيشي اؤزل دير. دانيشيغينين اورتاسيندا هردن ائله شوقا گليركي ائله بيل او ايلك گؤردويون بارز دئييل. ائله ايستي دانيشير كي ايسته ميرسين قورتولسون. آشيقلاردان دانيشاندا ايللاهيم بئله اولور؛

- آشيق هاوالاريندان هانسي سين چوخ سئويرسين؟

- ايندي هاميسي داغيليب آرادان گئتمه ده دير. آما "يانيق كرمي" ني چوخ سئويرم.

آي آغالار آشيق نيفتي اؤلندن

حسرت قاليب سازا، سؤزه ائللريم

"آشيق نيفتي چوخ سسلي ايدي، زيل سسي وار ايدي. اؤزونونده شوخ قامتي وار ايدي. او آشيقلار كي قديم بو اوزون بيز گئيمه دييه ريك گئيرديلر ها اورتاسيدا بوزمه لي، اولاردان گئيردي. «علي نن رافي نين» ناغيلين دئينده  آند اول آللاها دوز نه دئييم نئچه پوكا{بالابانين پيله جه يي} پارتلاردي. بالابانچيلار آتارديلار آيريسين دَييشرديلر. آشيق علي نن رافي دن دئينده ائله قيزادري كي آدام دييردي دوووارلاردا تيتره يير. پوكا پارتلاماغي نه ايستيليك له يئنه تيكرار ائله يير. سانكي بارز اوزوده قيزيشيب، ائله بيل اوگونلرده ياشايير.

-اوستاد آشيقلارين هانسي سيندان اؤترو چوخ داريخارسان؟ هاميسيسين سئوميشم اؤ‍ حياتيمدا تفووت قاييل اولماميشام هئچ .  آما ائله داريخماق منيم زيندگانليغيمدا واردير.

-عشقيميزي اؤلدوردولر  

آي آشيقلار ياسا گلين

-بيرگون يئنه آشيقلاريميز ساز چالاجاقدير

زينداندا قالان سازلاري ياده سالاجاقدير

سخاوت عزتي جنابلاري سوروشاندا؛

-اوستاد من بئلنچيك بير يازي يازميشديم؛ "اوستاد بارز شهرده داريخير؟" دوزدور بو سؤز؟

بير آه چكيب آرتيرير؛

-هن دوزدور.

-اوستاد كنديده راحاتيدين بوردا يوخسا؟

-آخي بوردا قوجاليق وار، دئييب دينمير. هرزادي آنلاماق اولور.

بارز ياندي، ياراتدي، اونا گؤره ده كرم كيمين عصيرلرين ياديندان چيخماياجاق. ساچ آغاردي آما نه بيز نه وطن، بارزي اونوتماياجاغيق. نئجه كي اونوتماميشيق. بارز بيزيم قارا گونلريميزده يازيب ياراديب دير. نئچه چتين چتين ايشلره بو ايشينه گورا معروض قاليبدير. شاهليق رژيمي ايله قارشي قارشييا دوروب ديليميزي، دوشونجه ميزي ديرچلتمه يه چاليشيب دير. گله جه ييميز نئجه بارزي اونوداجاق؟ اونودا بيلمه جه ييك، نييه كي او تاريخيميزين داها بير پارچاسيدير، او بيزيم ادبياتيميزين بؤيوك قولودور.

ائوينه گئديرسن آز قالا باغرين چارتلاسين. "قوجاليغين ائوي تيكيلسين" بير آدديم يئريمه يه چلييه سؤيكه نير. گونو تبريزده كئچن بارز داها بير آدديمدا اؤز باشينا ائوين آدديملايانمير. بارزين تبريزدن اؤترو داريخماسين اؤزوندن باشقا كيم دوشونمه يه جك. نئجه كي يالقيزليغين دوشونمه ديك. ايكي ايلدير قوجاليقدان ساري هئچ بير جيزما قاراسيدا اولماييب و بودور بارزين يالقيزليغي.

-اوستاد يئنه شئعر يازيرسان؟

-بو داريخما قويسا يازارام آما قويموركي!

 بير يازيچييا بوندان باشقا نه اولمالي دير؟ كيمسه قاپيسين آچمايير، ياني آچيرلار ها ائله دئسم اينجيين اولار، آما چوخ آز. اونلاردا بللي دير كيم اولا بيلرلر. نييه دونن يازان يازيچي نين الين توتوب ماراقلانديريريق آما بير عؤمور يازيب ياراداني سونوندا يالقيز بوراخيريق؟ بارز داها ايندي حايات يولداشي ايله بيرگه ياشاماقدادير، منيم يا سنين گئتمه ييميزه گركلي دئييل. آيدا 90 مين اعصاب داواسينين پولودور. نئچه كيتابي چاپا حاضيردير و يالنيز و يالنيز مادي چتين ليك لره گؤره ائو بوجاغيندا توز آلتيدا قاليبلار. يايين ائولريميزينده كي اوزلري آغ اولسون هر ايشي پولدا گؤرورلر.

ايللر اؤنجه بارزي اهرين خياوانلاريندا دولاشاندا گؤرموشدوم؛ آغ ساچلي اوزون بوي-بوخونلو بير كيشي. يان يؤوره سينه باخمادان باشين آشاغا ساليب آخشامين سايخانج چاغلاريندا شهرين سايخانج خياوانلاريندا دولاناردي، هردنده كيتاب ائولرينده يولداشلاري ايله بيرليكده اوتوراردي. اوچ ايل بوندان اؤنجه ده نئچه ايل گؤرمه دييمه گؤره اوره ييم سيخيلدي گؤروشونه گئتديم. داها آياغا قالخانميردي. باخيشلاريندان دورومونو دوشنمك اولاردي. ال اوزالتديم اللريمي سيخدي، "سانكي بير ميللتين الين سيخيردي"!. گولومسه دي آما بير سؤز دانيشمادي. يانيدا شئعرلريندن اوخودوق، آغلادي و بيزي آغلاتدي. نئچه گون بوندان اؤنجه ده گؤروشونه گئتميشديم، "ياسلي ساوالان" شئعريني اوخودو. سانكي يئنيدن يازيردي، اورتادا باشين كيتابدان قالديريب باخدي، اوخودو باشا چاتاندان سونرا بير آه چكدي. داها نه ديندي نه دانيشدي. آياغا قالخديق، يئنه گؤروشدو و ايللر بويو بئلنچيك گؤروشونه گئتمك ديله يي ايله آيريلديق.